قصيدة عامة لـ (هانى مهانى) - ممنوع تتكلم عن نصك

ممنوع تتكلم عن نصك

مش عارف أقول أنهى قصيدة
ما أنا عندى قصايد ياما إتقالت
وسمعتوها
فبفكر نتكلم أحسن
مثلا نتكلم ع التعليق
بصراحة الموضوع بيضايق
بقى فيه تعليق محفوظ
والواحد بقى عارف مين اللى يعلق
على أنهى قصيدة
وها يقول إيه !!!
مثلا واحد ها يقول احسنت
بس انا مش فاهم
واحد ها يقولك فى كام كلمة
مش ماشيين مع بيئة النص
ونصك اللى سمعته من ست سنين
كان احسن
بس النص عجبنى
وبعتبره أحلى نصوصك
- فتنَح .. مش فاهم
تسمع صوت بيقولك ش ش ما تعلقش
-أصل كلامة معارض بعضة
- ما تعلقش( ممنوع تتكلم عن نصك)
واللى يقولك قبل ما ها ابدأ أعلق.. مكسورة
يعنى لقط حوالى 11 كسر بعد المية
إزاى ؟! أنا كل قصيدتى اللى ها اقولها 11 بيت
ش ش ( ممنوع تتكلم عن نصك )
واحد تانى ...
عايز أقولك إنك لما كتبت
البطة الماشية بتقول كاك
ماكنتش تقصد طبعا البطة اللى احنا بنعرفها
لأن الرمز بتاع البطة
فى العلم اللى أنا متمكن منه
يعنى الروح الرايحة الجاية
الماشية الناحية التانية
وتبقى الناس فاكراها ..
الماشية الناحيه دى
لان الروح زى ما عارفين أأأأأ
فأكيد طبعاً الكاك مختلفة
- الكاك صوت البطة . أكيد مختلفة –
وانا شايف إنك احسن حاجة تبطل تكتب
واللى يقولك ....
كل قصايدك نفس الشكل
حتى المعجم عندك محدود
وكلامك متوقع آخرة
وكمان بتجيب كلمات علشان الوزن أو القافية
- قصدك مجلوبة
ش ش ...ممنوع تتكلم عن نصك
- سيبه يكمل ... هو براحته
بس بيعجبنى ان انت مجدد
دايما عندك بلقى جديد
وخصوصاً فى الكلمات المستخدمة جوا الحالة
فتحس إن إنت أأأأأأ
.........................
واحد تانى ....
الفلسفة فى النص صراحة
كانت مش مفهومة
لكن واضحة و وصلت
وكلامك بيفكرنى بالشاعر سيد سيد
والشاعر أحمد أحمد
نفس السكة ونفس المواضيع
ودة مش عيب
حتى ودانك شبه الشاعر مدحت مدحت
حتى عنيك شبه الشاعر .. مش فاكر
بس أكيد لازم طبعا تبقى شبه شاعر معروف
أو متأثر بيه .. أو تعرف حد قريبة
وما اقدرش اقولك غير ربنا يخرب بيتك
ويا ريت تزعل منى .. لأن أنا زعلان من نفسى
وقرفان م اللى بيكتبوا زيى .. وشكراً
( ممنوع تتكلم عن نصك )
أنا ما اتكلمتش
حسيت إنك عندك نيه إنك تتكلم
إياك تتكلم .... إتفضل
كح كح كح .. فى الأول أحب اقولك إنك شاعر
والشاعر زى ما قال منصور منصور ف كتابه
الشاعر إمتى يكون شاعر أأأأأ
ده يخلينا نروح لقضية كبيرة تتلخص ف حوالى
ستين نقطة .. النقطة الأولى أأأأ
النقطة الخمسة وستين أأأأ
وأنا لما كتبت قصيدة روح
كنت أقصد نفس الحاجة
وأنا لما حاولت أوضح ف قصيدة ضوء
كان كل كلامى عن الموضوع
وأنا لما فكرت إزاى ممكن نوصل لهناك
فكتبت ديوان كامل عن نفس الحالة
فأنا لازم اقولك
إن أنا لما كتبت قصيدة سين – برضه –
كان قصدى الحرف لوحده
ولازم نعرف إننا لازم نعرف
علشان نبقى ملمين بالموضوع
فياريت التكثيف علشان الناس ..
- عايز أقول إن أنا .....
ش ش ( ممنوع تتكلم عن نصك )
- أصل الموضوع....( ممنوع)
كان لازم اوضح
ش ش ( ممنوع تتكلم عن نصك )
مش ع النص ... ولازم تسمع
- ايوة يا سيدى عايز إيه ؟ !
أنا لسة ما قولتش نصى !!!

هانى مهران